أفكارنا .. مجلة × مدونة !!

كلابو اوف مدينة السلاحف !!
 

مدينه السلاحف ملهاش علاقه بمدينه بهائم جابرييل ماركيز ,,ومش مدينه ترفيهيه ف ديزنى لاند
الناس فى مدينه السلاحف مش خضر , ولا ابطأ من غيرهم ...
مدينه السلاحف تختلف ..
مدينه السلاحف حيث (السياع) مش (الصياع) ., حيث جراده و حلاوه وحطبه وهوبا والدكش .
واختلف المؤرخون " الى درجه التراشق بالاحذيه وسب الدين" حول اسباب تسميتها بهذا الاسم
بس دا مش موضوعنا ...
موضوعنا ان اسطوره مدينه السلاحف الخالده " كلابو " مات ..

كلابو مات .. كلابو مات
آخر خبر فِ الراديوهات
و فِ الكنايس
و الجوامع
و فِ الحواري
و الشوارع
وعَ القهاوي و َ البارات
كلابو مات
كلابو مات

مات فى خناقه غير متكافئه مع "الكنى" و " الليطه" و " حبايه " لانه كان بيطالب بحقه الطبيعى
فى ان محدش يبيع حشيش قدام قهوه الحاج سلامه "اللى كانت اصلا مصنع بلاط ناجح لكن ورثه الحاج قلبوها قهوه " لانها منطقته
اللى بيبيع فيها ..

مات المناضل المثال
يا ميت خسارة عَ الرجال
مات الجدع فوق مطوته جوّه الحارات
جسّد نضاله بمصرعه
و من سُكات
لا طبالين يفرقعوا
و لا اعلانات

عشان كده اول ما شاف " الكنى " وهوا بيقطع حته بتمانين ل سليم السمسمار "سمسار من اثرياء الانفتاح السعيد لكنه رفض يسيب مدينه السلاحف عشان العين " هاج وماج وعلى طول نزل من التوك التوك " بتاع عبده انبوبه اللى كان بتاع انابيب وربنا فتح عليه وفتح محل كوافير بتدوره اخته اللى بيقولوا انها كانت ماشيه ف البطال قبل ما تلبس النقاب " وسحب "كلابو" التلت من جوا التوك توك
- اللى مربتوش امه يربيه كلابو , اثبت يا ابن المره منك ليه
وزام على " الكنى"بكل ما بداخله من قوه واراده وتيرمادول وهوا بيسن التلت ف اسفلت الشارع ,لكن مطاوى الغدر صابته من كل حته

كلابو مات
لا طنطنة
و لا شنشنة
و لا إعلامات و استعلامات
عيني عليه ساعة القضا
من غير رفاقه تودّعه
يطلع أنينه للفضا
يزعق و لا مين يسمعه

والتف حواليه " حبايه" و"الليطه " وكتفوه ,, وطبعا كانوا بيضربوا بقلب عشان اخو " حبايه " امين شرطه وهيسلكهم من اى لبش
ف النهايه وقع " كلابو" وهوا بينزف من كل حته , لكنه مكانش بيتأ لم " طبعا عشان الاباتريل " وكانت اخر كلمات

- العيال دى غشيمه

وفاضت روحه ....
صور كتير ملو الخيال
و ألف مليون إحتمال
لكن أكيد و لا جدال
كلابو مات موتة رجال

( مدينه السلاحف جغرافيا هيا المنطقه المحصوره

بين تقسيم الفضالى وسوق شارع 30 وهى منطقه تتارجح بين العصافره وسيدى بشر

محمد عواد

المركز الأول (قصة قصيرة) 

دوس هنا وسيب تعليقك !!