قصيدة بدون عنوان

 و عرفت إنها كانت
أغبى مما تتصور
و إن الحب مش ليها
لإنه تفاهة مش أكتر
و حلفت إن ف حياتها
لا يمكن تانى تتهور
مش علشان يومين تفرح
تخلى قلبها يكفر
أصل الحب كان دينه
و قدره اللى متقدر
غباء بعته القدر ليها
لا يمكن عمره يتكرر
و بعد فراقها للضحكة
هتخسر تانى إيه أكبر
ده اللي كانت الضحكة معاه
م القلب بتكركر
بقى سبب ف الوحده
و القلب اللى متكسر
و اللى لا يمكن يوم يرجع
لسابق عهده ما يتأثر
أصل الحب لو جالك
يا يحييك يا تدمر
لونين مالهومش لون تالت
يا لون أبيض يا لون أسمر
يا تقضى العمر ع الذكرى
يا حبك للحياه يكبر
و لو ضاعت فرصتك منك
يبقى حظك انت أوفر
عشان الجرح لو صابك
هتقضى العمر تتحسر

 ندى عز 

دوس هنا وسيب تعليقك !!