أنا عاشقك ..
بسافر كل يوم لكن
حياة القلب فى قربك
وفى نبضى الأنين ساكن
وبتمنى أكون جنبك
. . .
بعيد عنى
ويمكن لسه فاكرانى
وقلبى لما بيغنى
بتحلم بيكى ألحانى
. . .
ياساكنانى وساندانى
وقايدة النار فى وجدانى
همومى بتبتسم لما
بحس إن انتى عشقانى
. . .
جفون قلبى مبتنمش
ولو طال النعاس عينى
وننى العين ميطلبش
سوى إنك تضمينى
. . .
تحسينى
بلاش تيجى وتتشاكلى عشان شكلى
وجربى لو مرة بس حبينى
بشوف فى جمالك الدنيا بتضحكلى
وبشوف فى عيونك الأشواق تنادينى
. . .
أنا عاشقك
وساكن كل أوهامك
وأحلامك بعيش فيها
وبارسم دنيتى ليها
وأول ضحكة بسمعها
بلاقى فرحتى فيها
. . .
صباحك فل
ومن بين السما عيونك
شموس بتطل
تلون كل أحلامى
يا ست الكل
. . .
يا كلمة شعر جوايا
يا قمره مضيئة فى سمايا
يا نغمه تقول حروف اسمى
وعلشانك بحب الذل
. . .
تناديلى أجيلك جرى
وأتعطر وأتمنظر
وأتغندر وأتغير
ما بين إيدك أنا صغير
لا أنا قادر أطول قصرك
ولا حبك ده بيخير
وإيدى لما تزور خصرك
عروقى كلها تنور..
فى لحظة واحدة أتهور
وأجيلك تحت شباكك
أناديلك .. وأغنيلك
وأحط الورد على بابك
وألاقى بين جفون قلبك
دواء لقلبى اللى متعور
..............................
